「夜渡欄河再倚，北風我迎頭再遇，動盪如這海，城在兩岸凝神對視……」，呢首經典金曲，係咪好浪漫、好有詩意呢？可惜吖，家陣船飛愈來愈貴，睇怕好快就冇呢支歌仔唱咯！
呢，港府早前批准天星小輪旗下中環至尖沙咀以及灣仔至尖沙咀兩條專營渡輪航線加價，平均加幅達百分之八點九，今年七月生效，原本以為加幅跑贏通脹一大截，夠飛擒大咬啦，點知船公司仲嫌唔夠喉，話加幅同原來申請幅度有好大落差，唔排除年底再申請加價超過一成喎。
原來船公司開頭申請分兩個階段加價，累計票價複合增幅高達百分之二十五，船公司開天索價，港府就係咁意中間落墨，敷衍民意。冇錯，今次只係加兩、三毫子，表面似乎濕濕碎，但小數怕長計，除咗上述兩條小輪航線，新渡輪經營嘅北角來往紅磡及九龍城航線、中環來往梅窩航線，四月起已搶閘加價高達一成半，其餘五條離島航線亦會喺七月加價，連埋機場鐵路建議加價一成，嚟緊可能仲有其他公交機構跟隊，條數都咪話唔襟計。
正所謂欲加之價，何患無辭，船公司梗係理由多多，唔係話油價飆升，就係話中環碼頭搬遷以至鐵路競爭令客量減少，甚至連員工都擺埋上枱，話要加薪挽留人才喎。即係咁，逐利係商人天性，船公司將經營困難吹到有咁大得咁大就梗嘅嘞，加上船公司賺蝕幾多，根本無乜透明度，政府都可能矇查查任得人昆。但點講都好，大家眼見嘅係，渡輪客量近年嚟的確係滾水淥豬腸──兩頭縮，繼續加價只會弄巧成拙，落入「加價，趕客，再加價，再趕客」嘅惡性循環。既然係咁，點解唔掉轉頭嚟諗，實行大減價，吸引番多啲人流，維多利亞港貴為世界三大夜景之一，渡輪服務做到冇停手就有份，點會愁拍烏蠅吖。
講真，薄利多銷，形成規模效應，道理一字咁淺，依家全球最hit嘅共享單車，正正就係呢個概念，就算船公司扮唔明，港產官僚都應該一清二楚，正如有人建議，私人公司唔願意經營，政府大可考慮自設船隊，收番嚟自己做！
不過嘥氣啦，咪睇呢個政府坐擁金山銀山，凡事一樣只向錢看，好似港鐵呢種全球賺錢數一數二嘅公用事業，政府唔單止攬住唔放，仲任由票價只加不減，將市民當水魚咁撳；至於渡輪服務一類蠅頭小利嘅雞肋，政府甩包袱唯恐不及，一嘢推晒畀私人公司就關人個關，仲有冇再不負責任啲吖。
冇計喇，港產官僚出名冇膊頭、冇腰骨，家陣仲要一個二個收夠籌等收工，旨意佢哋幫市民做嘢，慳番啖氣暖肚好過！