政情：今日你上鏡：蔣麗芸編更表 陪爸爸健身
都市人生活忙碌，好多時下定咗決心要做運動，但之後就藉口多多，轉個頭就半途而廢。但已經九十幾歲嘅「機器大王」蔣震就一定冇呢種情況喇！事關佢個囡，立法會議員蔣麗芸（阿Ann）已經同其他姊妹編好更表，個個星期都陪爸爸去馬會健身，仲一邊做運動一邊講笑，難怪爸爸個個禮拜都風雨不改去做運動啦！
阿Ann之前陪爸爸去健身室做運動，見爸爸做完腳踏車運動後，就問吓爸爸攰唔攰啦！點知佢淨係講咗兩個字「老喇」，阿Ann可能怕激嬲爸爸，即刻兜番話「你唔老，唔老」，點知爸爸睥住部腳踏車話「唔係我老，係呢部腳踏車舊喇，老喇！」九十幾歲都仲咁幽默，難怪阿Ann都笑到見牙唔見眼。
阿Ann之後透露，話爸爸都有番咁上下年紀，所以幾姊妹已經編好更表，個個星期都會輪流陪佢去健身室做運動，仲會搵定教練同爸爸拉橡筋繩同打拳添！而阿Ann自己每個月都會抽一兩日陪爸爸健身，等佢唔使咁悶喎。