政情：李軒朗7票當選學聯秘書長
喺一四年佔領行動後引發嘅退聯潮，令當年有份領導佔領行動嘅香港專上學生聯會（學聯）潰不成軍，八所院校學生會退剩一半，據知學聯今年初換屆選舉無法選出學聯秘書長等位置，最終要安排喺前日補選，結果出爐由中大李軒朗當選，信任票七票、不信任票一票及棄權票兩票，其得票低於上屆學聯秘書長陳旻義嘅十張信任票，以及喺前年退聯潮後，以三十七張信任票當選學聯秘書長嘅羅冠聰。
財政唔透明 今年終補鑊
不過，值得留意嘅係，學聯早前已取消過去為人詬病嘅「上莊選下莊」嘅歷史問題，因此今次選舉係首屆冇「上莊選下莊」，相比之下選民人數較前一、兩屆有一定比例減少，對於李軒朗當選嘅票數或有所影響。此外，與李軒朗同樣來自中大嘅袁德智順利當選副秘書長，合共獲得十張信任票，冇任何不信任及棄權票。
事實上，近年學聯聲勢大不如前，學聯一直被詬病財政唔透明、「上莊選下莊」等問題，今屆代表會早前透過修章「補鑊」，而學聯過去每年都會硬性收取旗下學生會每人六蚊會費，今年亦決定扣除開支之後退回餘數，並且公開財政報告，儘管如此，要令已退聯嘅院校重返學聯，似乎非一時三刻可以有突破性進展。