政情：廿三條立法 王敏剛交波新政府
自○三年起，港區全國人大代表王敏剛每年兩會都會將《基本法》廿三條立法掛喺嘴邊，但今年佢就突然轉口風話廿三條冇迫切性，尋日仲開口話幾時立法應該交番畀新政府決定喎！之不過，基本法委員會委員饒戈平早前仲講緊，話國家安全同維護人權同樣重要，唔能夠因為困難或者有人唔鍾意就拖延立法。唔通王敏剛已經收晒火？
疑似收火 籲市民多給予空間
王敏剛尋日出席一個電台節目後話廿三條有預防嘅作用，但香港社會近年出現過佔中、旺角暴亂、甚至在立法會出現違法反憲制嘅情況，已經遠遠超過廿三條嘅功能，但自己仍然極力支持廿三條立法。至於幾時先可以成事呢？佢就話唔多唔少都要視乎新政府推動政策嘅優次。
雖然佢把口就話立法工作唔應該拖延，但佢仲補多句，話當事人係特區政府，呼籲大家畀啲空間佢，等新政府可以衡量情況決定幾時推動喎！咁講法，佢似乎都已經收晒火，到底佢係等緊合適時機再出招，定有其他意思呢？佢又話，其實香港已經有普選，只不過大家所要求嘅係「直接選舉」所以先會出現咁多爭拗！佢就話大家應該平心靜氣去研究民主嘅真諦，了解吓乜嘢先叫普選，而佢自己喺人大提過，希望人大可以喺香港推動研究真普選嘅定義喎。