政情：為履行社服令 羅冠聰立會冇影

羅冠聰透露，一百二十小時嘅社會服務令已履行逾半，因為佢身份較敏感，所以做服務初期主要被安排閒日到工地單獨工作，所以要缺席唔少星期一、二舉行嘅立法會會議。而佢首個服務嘅地點係喺盲人輔導會做雜務，之後就分配去油塘一間惜食NGO塗牆漆同畫牆畫。

最怕集體工作惹衝突

佢坦言最初害怕被安排到工地參與集體工作，擔心會遇到政治立場唔同嘅人而引起衝突，但之後就被分配到NGO參與集體嘅工作，同佢一齊工作嘅人涉及唔同背景，有人討厭佔旺，亦有人覺得佢係收受外國資助同支援，搞港獨肯定冇出路，卻又認為單程證係侵蝕香港，應該有人發聲反對政府有問題嘅政策。

對於呢啲人嘅觀點，羅冠聰指對方應該冇受過社會科學、政治學理論培訓，但又話喺呢種環境嘅觀察，令佢能了解乜嘢係意識形態宣傳所能培養到嘅政治主場，乜嘢社會環境同政策係小市民直覺反感喎。