政情：「媽打」升呢嫲嫲 親自陪月
人稱「媽打」嘅民政事務局前常務秘書長李麗娟日前抱孫，「升呢」做嫲嫲！佢話今次係第一次抱孫，兒子同新抱一索得男，佢心情仲緊張過自己做媽媽嗰時，有好多準備工夫要做，佢仲親自做埋新抱嘅陪月員添，夠晒體貼。
媽打話呢幾日雖然冇乜點瞓覺，但一提到孫仔即刻神采飛揚，仲好開心咁分享孫仔啲相畀一班好友睇，原來佢孫仔出世第一日已經識伸脷，表情多多，而且頭髮好濃密，佢身旁嘅「放射科女王」梁馮令儀更大呼好想快啲抱孫喎。
叫得做眾人媽打，加上佢自己都係一個有經驗嘅媽媽，新抱喺醫院呢幾日，媽打就親自擔任陪月工作，指好佩服依家嘅媽媽餵哺母乳，因為見到新抱餵母乳時都好辛苦。梁馮令儀就話以前好多人生完小朋友之後會收到免費奶粉，但其實母乳係最佳選擇，可令嬰兒免疫力更高，餵母乳嘅媽媽亦可以食黃豆同黑豆補充。