政情：區會撥款自己批 民署議員要補鑊
日前審計署發表嘅審計報告中，大鬧區議會喺審批「社區參與計劃」撥款時，有區議員涉嫌「自己批自己」，懶理申報制度，喺冇申報利益下審批撥款。事隔幾日，民政事務局局長劉江華回應事件，話同意審計署嘅睇法，覺得申報機制需要改善。但其實早喺上年年初，現屆區議會當選後，民政事務總署已更新過區議會嘅利益申報守則，但依家就爆單自己批自己事件，證明現有守則監管不足，署長謝小華同班議員梗係要補鑊喇！
涉利益衝突照開會
其實區議會本身亦有常規，規定喺處理同撥款有關嘅事項上，區議員係需要作出第二層利益申報。不過，審計署就發現，區議會喺處理一五／一六年度嘅撥款時，發現一百二十二項區議員或委員利益申報項目當中，有成七十三宗係冇按照區議會常規作出裁決，令涉嫌有利益衝突嘅成員仲可以繼續參與會議。
以往區議會嘅利益申報制度，一向被批評唔統一，上屆區議會更加爆出好幾單利益衝突疑雲事件。其實民政事務總署曾經參考過立法會議員個人利益申報表格編排，更新區議會嘅個人利益申報制度，但爆出呢次事件後，好明顯更新制度根本冇成效。
謝小華責任冇得卸
劉江華仲話會責成所有區議會，就撥款進程作出監督。換言之民政事務總署署長謝小華要負起責任，喺處理利益申報上要再嚴格啲。除咗政府當局，其實區議員本身都有責任，如果佢哋唔執番正，就算政府點嚴格執行都冇用。
據了解，有唔少區議員都有擔任非政府機構同社團組織嘅成員，當中包括會長、名譽會長、主席等等。依家爆出利益申報疑雲，相信班區議員都幾尷尬。有區議員就透露，打算喺任期完結後就唔再續任呢啲機構嘅職位，以免日後再爆同類型事件。之不過，總會有議員見過鬼唔怕黑，繼續出任機構職位，真係唔知謝小華點拆彈嘞！