中環出更：張建宗爛透普通話 「兩制」變「兩雞」
香港回歸後，唔少官員喺公開發言時都會以普通話發言，但並唔係每個官員都擅長兩文三語，所以經常鬧出笑話。政務司司長張建宗（小肥張）尋日出席一個回歸二十周年研討會時，就罕有以普通話致詞，佢提到「一國兩制」時竟然講成「一國兩雞」，佢嘅普通話真係「技驚四座」。
發言後段全用港式普通話
小肥張發言時話《基本法》規定香港嘅制度，保障香港嘅一國兩制、港人治港同高度自治，對保持香港繁榮穩定有重要作用。佢又認為市民要全面認識《基本法》，先可以發揮作用。
短短十分鐘嘅發言，小肥張似乎都講得相當吃力，一開始時佢嘗試「字正腔圓」讀出正確讀音，但「兩制」仍然讀成「兩雞」，我很「高興」亦讀成「膠興」；而發言去到尾段，佢似乎處喺半放棄情況，港式普通話全面進場，已經去到幾乎聽唔明嘅程度。講到尾，為免語言成為兩地官員之間嘅隔閡，小肥張似乎要盡快練習普通話先得喇！
卓妮