中環出更：林建康愛日本溫泉「軟件」好
早前有高官去完粵港澳大灣區相關城市考察後，力薦港人去恩平浸溫泉，唔使去日本，但觀乎市民喺網上嘅反應，始終都對日本溫泉情有獨鍾。卓妮尋日喺沙田馬場見到愛沙尼亞共和國駐港名譽領事林建康，佢就話溫泉嘅環境設施等硬件固然重要，但最重要係軟件喎。
單拖現身馬場嘅林建康話太太去咗瑞士探二家姐，之後再飛去倫敦時佢先會合太太。講起瑞士都有溫泉浸，林建康就話未試過，通常都喺日本浸，而台灣嘅溫泉文化雖然頗接近日本，但佢見有啲人都會着埋拖鞋入去，感覺唔夠乾淨，直言去邊浸唔係重點，重點係啲人嘅衞生意識及文化。咁假如內地有溫泉好新好乾淨佢又會唔會去？佢就笑笑口話如果卓妮都敢去，佢就去喎！
鄺晶晶唔慣「肉帛相見」文化
菁英會體育研究會主席潘偉業、太太鄺晶晶同名媛林李婉冰都有現身，林李婉冰一聽到溫泉即耍手擰頭，話自己怕水又驚污糟，水上活動唔啱佢，連日本嘅溫泉都唔會浸，郵輪亦唔會搭，話跌咗落水都唔知點算。
至於鄺晶晶就曾經喺日本留學，仲做過一段時間日文翻譯，但佢透露唔係嗰種文化長大，始終都唔太習慣同朋友肉帛相見，每次同朋友浸溫泉，初時都總會用毛巾遮遮掩掩，遮遮吓先慢慢適應。佢仲笑言有次男女浸喺同一個池，中間只隔咗塊板，啲女仔一邊浸一邊聽到男士講嘢仲可以傾偈，好驚佢哋潛過嚟，但發現原來啲水咁熱係唔得嘅，先放心晒。佢老公潘偉業就指冇諗過去恩平浸溫泉，但就諗過去內地嘅水上樂園，話有朋友教佢哋要喺夏天旺季前去，啲水較乾淨咁話。
卓妮