中環出更:傳陳美齡獲邀做教育局局長

現任教育局局長吳克儉事先張揚唔會留任,政圈對下任教育局局長人選議論紛紛,最新傳出曾風靡港日嘅女歌手陳美齡(Agnes)獲邀出任教育局局長,Agnes接受傳媒訪問時雖不評論有關說法,但一講到有前立法會議員於宣誓時疑把「China」講成「支那」,佢形容感到驚奇及心痛,直指佢哋可能唔知道抗日戰爭時有幾多港人曾經受苦,佢又提出新建議,如果認為國民教育嘅名稱太敏感,可以改稱為「港民教育」喎。

冇否認傳聞 僅稱唔敢講

Agnes過去憑甜美歌聲曾紅遍香港及日本,其後嫁畀日籍丈夫,並育有三名兒子,本身擁有美國史丹福大學教育博士學歷嘅Agnes亦教子有方,三名兒子都考入史丹福大學,佢又先後出書分享對教育心得及理念。

對於有傳會成為下屆教育局局長,Agnes接受傳媒查詢時冇明確否認呢個傳聞,僅稱對此唔可以comment(評論)同唔敢講,但佢同時話,希望能夠帶到一陣新風進入香港教育,如果全部人希望,自己於任何崗位都願意。佢又疑似表明心迹,稱自己一直係香港籍,沒有入籍日本。

對於立法會去年宣誓風波中,青年新政游蕙禎及梁頌恆曾使用「支那」辱華字眼,Agnes直指呢個係教育嘅失敗,認為「唔係佢哋有咁毒嘅心,想得罪咁多人,而係佢哋唔知。」

對於陳美齡出任教育局局長嘅傳聞,立法會教育事務委員會主席蔣麗芸對今次傳聞感到驚訝,認為陳欠缺從政經驗,教育界議員葉建源則話,對陳美齡係咪合適局長人選有疑問。Agnes如果真係走入官場,相信逃唔過議員尖銳提問,唔知佢到時會否以甜美歌聲回應呢?

卓妮

第一手消息請下載on.cc東網iPhone/iPad/Android/Windows Phone Apps