政情：考察途經家鄉 林健鋒盡地主誼
立法會議員林健鋒（Jeffrey）同一大班議員近日返廣東考察，途經Jeffrey嘅家鄉佛山。識食嘅Jeffrey梗要一盡地主之誼，拉大隊去當地有名嘅歷史區，邊食消夜邊睇保育建築。
參觀百年藥材舖
佛山嘅「嶺南新天地」係當地嘅新式商業區，特色係區內有唔少歷史保育建築，並成功活化作商業用途，其中一間有過百年歷史嘅藥材舖，曾經醫好過清末大臣李鴻章嘅妻子，因此獲贈名匾而打響名堂。Jeffrey嚟到梗係唔執輸，手執藥材左摸右摸，又學秤藥材，學唔識都擺個姿勢影張相留念。
消夜方面，Jeffrey就安排咗菠蘿油、雞蛋仔同雙皮奶待客，佢話粵港口味相近，香港人一定食得慣。佢又話，當地可以將保育同本土商業共冶一爐，覺得香港都可以效法。