政情：八網難逃：愛上沙頭角 劉國勳帶隊暢遊
沙頭角部分區域近年陸續開放畀公眾，但絕大部分地方仍要事先申請禁區紙先可以進出，因北區區議員身份而擁有沙頭角禁區紙嘅立法會區議會（第一）功能界別議員劉國勳（Edward），似乎對遊覽沙頭角情有獨鍾，短短三個月內兩度遊覽沙頭角，最近仲化身「導遊」帶一批區議員遊覽添。
今次隨同Edward遊覽沙頭角嘅團友，包括深水埗區議員鄭泳舜、灣仔區議員鍾嘉敏、東區區議員洪連杉等人，Edward同鄭泳舜仲特登於鄰近內地邊境範圍前，寫有無合法理由進入香港區域的警告牌前合照留念。
建議開放更多禁區範圍
Edward話，今次帶團旨在促進區議員之間嘅交流，又笑言雖然自己唔及真正嘅導遊咁風趣，但就勝在做足功課，熟悉沙頭角嘅特別之處。佢再次建議政府，應該開放更多禁區範圍，或者喺假日設立前往禁區嘅港人配額，促進禁區經濟之餘，亦可以增加市民假日一日遊嘅選擇。