政情：民記攬兩席 房委會樹敵
港府於上月底公布新一批房屋委員會委員名單，立法會跨黨派均有代表榜上有名，之不過今次名單最令人意想不到嘅係，民建聯於房委會竟有兩名代表，即該黨兩名立法會議員張國鈞（Horace）及柯創盛（柯仔），有關安排旋即被批不公，據知對於呢個安排有意見嘅團體包括一直代表基層公屋戶嘅公屋聯會。身兼房委會主席嘅運輸及房屋局局長張炳良疑「分餅仔」唔勻等惹來不滿反彈，未來真係要打醒十二分精神嘞！
按照過去不成文慣例，房委會內廿多名委員，均有來自立法會主要黨派嘅代表，包括工聯會、民主黨、公民黨等均有代表獲垂青加入房委會，不過，最新出爐嘅名單有「新猷」，竟然來自同一政黨嘅民建聯有兩個代表，分別係獲得續任嘅Horace，及新獲委任嘅柯仔，至於新任公屋聯會主席文裕明，事先張揚希望公屋聯會有代表於房委會嘅願望就落空。
一黨兩代表 被指不合適
文裕明接受查詢時話，目前一個政黨於房委會大會中有兩個代表，形容有關情況奇怪同唔太合適，擔心會有個別人士堅持己見；文續指，公屋基層團體於房委會內冇代表，亦未能體現均衡參與，對此表示遺憾。
對於民建聯罕有地於房委會有兩名代表，柯仔及Horace都有解畫試圖拆彈，其中柯仔話自己一直係房委會資助房屋小組委員，相信自己唔係因為民建聯成員嘅身份而獲得委任；Horace則話唔擔心存在觀感問題，因為該黨代表「都係一個起兩個止」，佢又相信同柯仔日後都會以事論事，政黨背景嘅影響唔會太大。
房委會：已權衡各方利益
房委會發言人回應指，房委會非官方委員係以個人身份獲委任，又指政府於考慮委任房委會委員時，會力求在委員嘅專業知識及市民利益之間作出妥善平衡。
之不過話說回來，民建聯於房委會內擁有兩席惹來不滿，呢個客觀事實始終唔會改變，相信一批關注房屋問題嘅團體及關注組，日後都會金睛火眼睇實及監察房委會各委員嘅言行，務求佢哋真正反映民意。