中環出更：容海恩批港中醫藥研發落後
立法會議員容海恩（Eunice）早前趁復活節假期離港，參加一個為期五日嘅考察團，包括前往四季如春嘅雲南省會昆明，睇吓當地有乜機遇，期間Eunice參觀完當地嘅中藥廠房後，有感而發話香港推動中醫藥研發唔夠積極，促請港府要盡快確立中醫藥喺公營醫療系統嘅定位。
Eunice日前同約二十名青年出發去昆明考察，期間專程去參觀當地特產「雲南白藥」嘅廠房，了解工業科技嘅發展對於藥劑產業帶來嘅影響，Eunice話，近年中國生產業迅速發展，加上國內嘅研發工作，已經令中醫藥產業有好大進步。
促確立中醫藥定位
資料顯示，香港自八十年代開始研究中醫藥嘅發展，至今超過三十年時間，仍然停留喺計劃發展中醫醫院同埋設立中藥檢測中心，Eunice慨嘆香港嘅醫療體系一直只以西醫為主，而且政府於推動中醫藥研發同應用工作唔夠積極。就此，佢要求政府要盡快確立中醫藥喺公營醫療系統嘅定位，完善中、西醫嘅醫療服務。
卓妮