中環出更：設計師旗袍登場 宣傳香港荷蘭日
荷蘭呢個國家以鬱金香、風車同木屐等著名，荷蘭駐港總領事館及香港亞洲藝術週定於本月舉辦香港荷蘭日，仲搵嚟為荷蘭皇室成員設計晚禮服的著名時裝設計師Addy van den Krommenacker首次於香港舉行時裝展打響頭炮，當日著名甜品設計師Marike van Beurden及鞋履設計師Bianca Blom都有現身，其中身穿旗袍嘅Bianca Blom仲自爆高踭鞋要着得舒服嘅「秘密」。
現場所見，Bianca身穿紅色長衫現身，係早前喺香港買，呢次仲係佢首次試着長衫，至於Bianca腳上穿着嘅高踭鞋睇上去雖然平平無奇，原來內有乾坤，經佢設計過加入咗好多軟墊喺裏面，點着點行都好舒服，同場嘅民政事務局副局長許曉暉見到呢對高踭鞋都覺得幾吸引，不過佢笑言，如果個踭矮返少少就好喇。
許曉暉話着木屐好難行
講番香港荷蘭日，既然要宣傳荷蘭文化，活動之一嘅時裝展，當然唔係普通時裝展咁簡單，今次Addy van den Krommenacker作品靈感，係源自知名荷蘭畫家博斯嘅作品，將名畫融入設計之中，事有巧合，荷蘭駐港總領事呂安微亦戴住Addy van den Krommenacker設計嘅絲巾現身。呂安微話，本月仲會有荷蘭電影節、荷蘭國王日酒會、講座及美食盛宴，希望大家踴躍參加。
許曉暉則談及四年前去荷蘭旅遊嘅經歷，自言好鍾意荷蘭嘅河流景色，以及當地嘅建築風格及文化，當時亦有試吓着木屐行幾步，不過笑稱着咗之後真係好重及好難行。此外向來食素嘅許曉暉於荷蘭依然有食神，期間食咗好多唔同種類嘅荷蘭芝士，至今仍然非常回味。
卓妮