美國自詡民主大國，郁啲就講人權，郁啲就講普世價值，成日有佢講冇人講，其實好虛偽嘅咋。嗱，今次美國聯合航空虐客醜聞衝出雲霄，醜出國際，簡直人神共憤，唔知美國呢鋪又點兜呢？
一石激起千重浪。聯合航空因為臨時安排機組人員登機，強行將一名拒絕讓位嘅年近七旬華裔乘客拖落機，搞到後者血流披面，事件激起全球怒火。唔止華人戮力聲討，就連美國人都睇唔過眼，唔使一日就有近十九萬人向白宮聯署要求徹查事件，可以話唔理乜嘢膚色、種族、政見、宗教嘅人都聯合一致，呢啲咪叫眾怒難犯囉。睇嚟聯合航空真係冇改錯名噃，今勻唔慌唔團結全世界咯。
大家有眼見，唔少聯合航空嘅常客都不齒其所為而發起杯葛行動，剪爛會員卡有之，自揭曾被該公司野蠻對待又有之，本港知名人士亦紛紛向呢間咁粗暴嘅航空公司說不，抵制浪潮簡直一浪接一浪。可能見公司股價插水知驚啩，聯合航空CEO再次公開道歉，除咗會為今次事件作深入調查，仲話會檢討超賣制度喎，其實都係做騷啫。唔係咩，佢呢頭向公眾及受害人道歉，嗰頭又發公司「E貓」，揚言支持員工嘅行為，道歉有幾多誠意，仲使問嘅。
講到尾，呢啲咪係美國嘅真正本色囉，表面上自由平等，大愛包容，實際上白人至上，種族歧視嘅暴行數到天光都數唔晒，今次偏偏向亞洲人落手，你估真係巧合咁簡單咩。嗱，白宮發言人話就話事件令人不安，又話總統特朗普已經知情，但就冇開聲譴責，隨着聯署人數愈來愈多，抨擊愈演愈烈，又即管睇吓白宮點樣自圓其說喇。
話時話，超賣問題唔係聯合航空獨有，香港嘅國泰航空同樣臭名昭著。淨係今個月咋，有客人買咗香港飛澳洲開恩茲嘅機票，臨上機至話機位超賣，夾硬要客人改飛墨爾本，唔止浪費時間，仲損失大筆旅費，國泰一句「行內慣例」就關人個關，仲有冇離譜啲吖。正如立法會議員話齋，本港係就係實施《商品說明條例》，但又容許航空公司超賣機位時提出補償或退款作抗辯理由，即係為航空公司度身訂造免死金牌啫，公我贏、字你輸，航空公司有恃無恐，店大欺客，港府咪就係幫兇囉。
都係古人講得啱，「多行不義必自斃」。自由市場有大把選擇，乘客無謂貼錢買難受，呢啲航空公司服務質素連廉航都不如，被乘客拋棄只係遲早嘅事，睇吓聯合航空被全球杯葛就知嘞，國泰航空再唔生性，都係一樣下場嘅咋！