政情:睇人旅行仲開心? 姚思榮:代表業界多生意

聽日就開始放復活節假嘞,正所謂「吊頸都要抖吓氣」,唔少政界人士都會趁呢幾日假期去轉旅行叉叉電。但立法會議員姚思榮復活節無份去玩,竟然話見到其他人去旅行,就比自己去更高興喎。咁奇怪?事關佢作為旅遊界代表,多人出去玩即係業界多生意,當然特別開心喇!

提醒旅社與時並進

雖則業界多生意,但係服務都要有所提升。姚思榮話近年網絡發達,自遊行愈見流行,所以旅行社正面對唔少挑戰,佢就提醒旅行社要與時並進、改善服務,好似產品要有獨特性、服務要貼心,唔係就好難做得住。

批評政府配套不足

講到早前台北市長柯文哲(柯P)話「香港很無聊」,雖然姚思榮唔認同呢個講法,但都要理解點解有呢個諗法嘅。佢對兩地作出比較,認為香港有能力倣效台灣咁,以自然風光作為賣點,認為更能夠吸引回頭客,喺香港進行深度遊添!不過,佢批評政府配套不足、後知後覺,所以吸引唔到旅客到訪景色宜人嘅世界地質公園同歷史建築物囉!

第一手消息請下載on.cc東網iPhone/iPad/Android/Windows Phone Apps