中環出更：朱凱廸話政府港鐵關係「好SM」
立法會工務小組委員會尋日開會討論南港島線（東段）主要基建工程嘅核准預算費用，由九億二千七百萬元增至十二億一千三百二十萬元，即係提高咗約二億八千多萬元。議員梁國雄（長毛）曾提出中止待續，但係動議最後被否決。議員朱凱廸就話而家港鐵公司一旦出現超支情況，就要政府用公帑付款，但係冇話語權，形容係「攞我哋荷包過橋」，更稱「我哋唔想畀人SM（性虐）o架。」
工程超支要用公帑找數
朱凱廸喺會議上批評，指因合約規定，政府同立法會就要「硬食」工程超支嘅撥款。佢話唔明白點解政府經常自行落入「好SM嘅關係」，指港鐵公司係一間財政穩健嘅公司，兼且已經自負盈虧，同時政府亦不斷用公帑同物業作出補貼，同埋為港鐵提供客源，認為政府嘅話語權應增加，但事實上就冇，甚至有超支嘅情況就由政府付款。長毛就嫌朱凱廸嘅形容唔夠貼切，反而用苦情戲嚟形容，話係「一個願打、一個願捱」至啱。
運輸及房屋局副局長邱誠武（邱副）就話有關基建工程當中，有啲係接駁到鐵路站嘅天橋或行人隧道，已經諮詢地區人士，回應社會需求，係屬於政府工程，唔係鐵路工程。邱副仲話因為有關基建工程已完成，若政府唔付款畀港鐵，即屬違約，而撥款有一定嘅逼切性，因為原有嘅九億元撥款預計喺年中用完，若果冇新增撥款，政府將無法支付工程費用。
卓妮