中環出更：阿媽教落福有「油雞」李鋈麟大個先悟真諦
「為善最樂，福有攸歸」就聽得多，新上任成為東華三院主席嘅李鋈麟就笑言，細細個聽媽媽講嘅時候以為係為善最樂，福有「油雞」，心想做善事有油雞食都幾好吖，大個咗之後就明白做善事真正目的，應該係幫助人而唔係為咗食油雞喎。
早前東華三院舉行董事局就職典禮，李鋈麟緊接馬陳家歡成為新一屆東華主席。自細同東華淵源甚深嘅佢除咗係喺廣華醫院出世，仲透露先父臨終前最後一段日子都係有賴東華中醫醫療服務悉心照顧減輕痛楚，當時父親更問佢睇病時可唔可以畀多啲錢，但診金有定，唔係佢想畀幾多就幾多，於是就決心加入東華做總理，還爸爸一個心願，點知一踏隻腳入東華就做咗八年，今年第九年仲做埋主席添！
馬陳家歡最滿足令東華年輕化
前主席馬陳家歡功成身退，喺就職晚宴時好似頒香港小姐咁將權杖交畀新任主席。馬陳家歡話一落莊已經極速去咗一轉短線旅行，返嚟出席完交接儀式後又準備再出發去下一個目的地。對於過去一年嘅工作，佢覺得滿足感最大嘅係令東華年輕化，多咗年輕人認識佢哋，而佢喺在任期間所參與同舉辦嘅活動更多達四百幾個，難怪佢話意外收穫係輕咗幾磅啦！
東華董事局一向型男靚女特別多，除咗副主席王賢誌、蔡榮星、文穎怡、總理何猷啟同蔡加怡外，譚鎮國同馬清揚亦雙雙由總理升呢做副主席。
今年仲有嫁咗畀「玻璃大王」李賢義兒子李聖根嘅前澳網雙打冠軍得主晏紫加入做新總理，原來，李聖根三兄妹都喺東華旗下嘅中學畢業，因此對東華特別有感情。
卓妮