政情：戴耀廷教泛民奪權 屎橋當秘笈
口噏噏真係可以當秘笈？已習慣將理想當成現實嘅佔中發起人、港大法律系副教授戴耀廷，近日又有偉論發表。佢尋日喺報章撰文，聲言可協助民主派喺千二人特首選舉委員會，奪取超過五百個選委議席，大大提高民主派左右特首選舉結果嘅實力。但原來戴耀廷呢條絕世好橋，根本係一條屎橋，成功前提係要民主派喺區議會選舉贏取過半數議席，仲科幻過佢之前提出嘅「和平佔中」同「雷動計劃」，民主派真係睬佢都傻嘅！
想將選委數目增至逾500席
民主派喺舊年選委會選舉取得逾三百二十席，主要來自社福界同法律、教育、資訊科技等十個以個人選民為基礎嘅專業選委界別。戴耀廷揚言，只要民主派下次再努力啲，就有機會全取該十個專業界別內嘅所有議席，將民主派嘅選委數目提升至約四百席。
至於餘下嗰百多席又嚟自邊度呢？戴耀廷認為以擁有五十七席嘅港九區議會，以及有六十席嘅新界區議會界別最容易埋手，理由係該兩個界別嘅選委，係由港九同新界各九個區議會內嘅民選區議員互選產生，民主成分較高；只要民主派能夠喺二○一九年舉行嘅區議會換屆選舉，同時贏取港九同新界區議會嘅過半數議席，按道理就可以喺二○二一年嘅選委會界別分組選舉，全取該一百一十七個選委議席，將民主派選委數目增至超過五百席。
之不過，搞選舉唔同計加數，理想同現實往往係有好大差距嘅，呢個亦係「和平佔中」同「雷動計劃」失敗嘅主要原因。眾所周知，喺較着重民生同地區議題嘅區議會選舉，民主派一向處於劣勢，近年議席數目不斷下跌，十八區區議會控制權全面失守，有個別區議會更死剩得一兩個區議員，直至前年區選先稍為由谷底反彈，但議席數目仍只佔整體約四分之一，要翻一番先可以變成過半數。與其寄望民主派忽然係區選中大殺建制派，不如再諗吓點樣爭取中央修訂人大八三一框架、早日畀香港落實雙普選好過喇！