中環出更：廢鑊遺禍 平機會捱唔住搬竇
曾多次被揭浪費公帑、被轟係「大花筒」嘅平等機會委員會，喺「廢鑊」周一嶽擔任主席期間變本加厲，豪租太古城中心擴充辦公室，令平機會面臨入不敷支，由於預期將出現結構性赤字，為免繼續捱貴租，平機會決定「斬纜」將辦公室搬去黃竹坑，仲話咁做係「別無選擇」添！
豪租辦公室 幾耗盡儲備
廢鑊當年選擇喺黃金地段嘅太古城中心擴充辦公室，租金高昂，喺上年呎租已升到四十四點五元，今年市值已漲到四十八元，但其實政府提供嘅呎租補貼只係二十二元，所以平機會如果續租就會出現結構性赤字，並喺二○一八／一九年度耗盡所有儲備。
為免繼續燒錢，平機會決定「斬纜」，將辦公室搬到租金水平較低嘅黃竹坑，又承認因偏離核心商業區，會為市民造成不便，但強調咁做都係因為租金上漲且補助不足所致，平機會係「別無選擇」。搞成咁，都係廢鑊所為。
既然就嚟乾塘，搬辦公室都係想節流啫，唔通又向納稅人伸手要求增撥公帑資助埋單咩！勢估唔到，平機會竟然挖番轉頭，話期望政府幫手設置永久辦事處，咁就唔使受租金波動而搬嚟搬去喎。即係又大花筒喇，又想打政府主意，撥大筆公帑出嚟畀佢哋買辦事處喇，好狼胎喎，平機會真係死性不改。
卓妮