名牌幼園揭家長奇招搵「叻仔」頂包面試
【本報訊】為令子女爭入心儀幼稚園，家長可以去到幾盡？首屆傑出教育家兼啟思幼稚園及幼兒園總校監陸趙鈞鴻透露，近兩三年，竟有家長帶朋友的「叻仔」假冒自己親子到學校參加幼兒班（K1）面試，校方翻查紀錄揭發事件；另有不滿子女表現的家長嬲爆掌摑子女。
對於教育局公布新《幼稚園教育課程指引》，訂明不應安排K1學生執筆寫字，陸趙鈞鴻昨直言，「呢個係我幾十年前提倡的睇法」，她指普遍家長怕子女遲寫字或遲學英文蝕底，但該校堅持母語為主要教學語言，「太早學英文，搞到中英夾雜才是最大問題」。校方不讓三歲學童寫字，只安排他們穿木珠仔、砌積木等訓練小肌肉，四歲半才執筆，「如果無訓練就即刻寫字，小朋友會好吃力」，自信心亦受影響。
啟思幼稚園十間分校，每年合共逾萬人報名。她強調，「足齡」是入學基本條件，「兩歲十個月都唔會收佢讀K1，因為太細，會害佢一世」，又指面試時接見學生及家長，詢問一些與日常生活相關的問題，亦在等候室觀察家長的行為。
曾有母親在等候室摑小孩
陸趙鈞鴻舉例，曾有媽媽在等候室摑小朋友兩巴掌，罵他「講極都唔識」，校方即時決定不取錄該申請人。另有申請學生被問及「今早食咗啲乜」時回答，因早上全家跪地祈禱祈求入啟思，故沒有吃早餐。趙鈞鴻十分欣賞學生說話自然，故取錄他。但她透露，有家長為取得學位，竟帶同朋友的「叻仔」頂替自己兒子來面試，老師感可疑，特別要求學生第二次面試，因而揭發事件。