政情：林琳被偷相開fb 最驚用嚟賣老翻
網絡世界真係有好多騙徒，荃灣區議員林琳就被人盜用相喺facebook開咗個「HK YDoll」帳戶，林琳嬲到即刻喺自己嘅社交網站廣傳，提醒朋友唔好上當。佢話最擔心呢個帳戶會賣老翻或情趣用品，甚至層壓式美容產品，到時隨時被人以為係佢呃人喎！
發動朋友聯合舉報
林琳話，有街坊發現呢個假帳戶後即刻話畀佢聽，佢已私訊警告對方可能已違反不誠實使用電腦嘅罪行，仲發動一班朋友一齊向fb舉報佢。佢話自己並非首次被人冒認，之前都試過有個少女扮佢打畀記者投訴某學校，又試過有賣栗子嘅檔主話，食環署職員曾經話佢投訴過嗰個栗子檔，但係佢根本冇做過。點知又遇上今次冒認事件，真係夠晒煩。