探射燈:洗樓賊專偷香爐利是

大埔驚現「香爐賊」,洗劫門口土地、天官利是!「香爐賊」近日肆虐大埔屋邨,於深夜時分潛入太和邨及運頭塘邨,在各樓層走廊,以洗樓方式,掠去住戶放於門口,屬於土地及天官的壓歲利是。惟「香爐賊」很揀擇,對利是內的幾毫子不屑一顧,只會偷取紙幣,更無視單位已安裝閉路電視,肆無忌憚偷取利是,過程足足用了五十秒。案件已令居民人心惶惶,議論紛紛,更擔心有人乘機踩線,留下記號,方便日後收藏毒品或爆竊單位。有大埔區區議員認為案件極不尋常,促警方加強巡查。

「咁猖狂,連門口地主香爐利是都唔放過?」居於運頭塘邨運來樓的葉太指出,三月二十四日早上在門口上香時,發現原本放於月餅盒的土地香爐,被移至不遠地方,放在香爐後面的利是不翼而飛。「原本以為係地主顯靈,但定一定神後,覺得有啲唔妥,翻查門口嘅閉路電視片段時,大嚇一驚。」

無視天眼 五十秒擸兩封

「喺當日嘅凌晨一點幾,有一名三十幾歲,身材瘦削,身穿黑衣、牛仔褲及白色波鞋嘅男子,單手插袋,大模廝樣走至我門口前,佢睇到個閉路電視,仍然施施然彎低身,偷取香爐後面嘅利是,然後又向天官埋手,攞埋第二封利是後離去,成個過程用咗五十秒咁耐。」她表示,已在門前貼上「已裝設廿四小時閉路錄影監察系統」的警告字句,仍無法阻嚇賊人。

「利是裏面只有兩個一毫,後來,我喺後樓梯丟垃圾嘅時候,發現兩封利是,裏面嘅兩個毫子仍然喺度。」她向其他樓層鄰居查問,發現並非個別事件,「個賊好『揀擇』,偷走鄰居放喺門口封廿蚊利是,我估係嫌我兩毫子利是少,就唔吼。」

香爐被搗亂 恐踩線標記

幾天後,「香爐賊」亦到距離運頭塘邨不足兩公里外的太和邨犯案,其中一名受害人,就是居於麗和樓的徐太,「朝早起身出門口『裝香』,發現門口『天官』香爐,畀人搞到東歪西倒,香爐灰亂七八糟;土地用嚟接住香灰嘅鐵兜,亦被踢走埋。」她指門前的香爐,並沒有放置利是,不排除賊人偷錢不果,洩憤搗亂。

事件惹起居民熱議,居於安和樓的吳生擔心,香爐被移動或搗亂,是與賊人「踩線」留記號,方便日後收藏毒品或爆竊單位有關。「最近太和邨治安差咗好多,樓下大堂通告指,亨和樓及居和樓亦先後發生盜竊案。前幾晚返屋企,見到有啲鄰居香爐畀人移歪咗,有啲就放咗喺路中心,唔知同案件有無關連。」他又稱,閒雜人等可於平台位置繞過保安監視,尾隨住戶進入大廈,情況猶如「無掩雞籠」。

同屋邨兩星期十宗投訴

大埔區區議員余智榮說:「最令人擔心嘅係,『香爐賊』以洗樓式,由運頭塘邨,犯案至太和邨,擔心會向同區其他屋邨埋手。」民建聯大埔支部社區主任黃國偉指出,最近兩星期接獲逾十宗有關太和邨香爐被搗亂或移位的投訴,「如果係一、兩單,好可能純粹係惡作劇,但短時間入面有咁多單,好唔尋常,警方需要加強巡查。」

由於兩條屋邨是租置屋,日常管理不是由房屋署負責,惟問題已惹起兩條屋邨的管業處關注。管理運頭塘邨及太和邨的新昌管理服務有限公司企業傳訊部蘇小姐稱,近日已收到運頭塘邨相關投訴,已訓示員工加強警覺,並要嚴格執行訪客登記制度。她又建議受影響住戶報警處理。

警方發言人表示,過去三年,大埔警區錄得的盜竊數字分別為,一六年的一千四百三十九宗、一五年的一千七百四十四宗及一四年的一千九百三十六宗。警方呼籲住戶提高警覺,發現可疑人士或相信有罪案發生時,應立即與警方聯絡。

圖/文:專案組

第一手消息請下載on.cc東網iPhone/iPad/Android/Windows Phone Apps