政情:收料站:促林鄭補撕裂 泛民自身難保

廿二個民主派議員尋日發聯合聲明,要求候任特首林鄭月娥喺重啟政改等條件下,修補撕裂,重返溝通嘅起步點,解決深層次矛盾。不過並唔係所有民主派都認同要同政府修補關係,好似自決派議員就全部無參與聯署。睇嚟民主派要解決社會撕裂之前,先要處理好內部分歧同矛盾先得。

聯署聲明提多項要求

聲明中提出多個條件,包括承諾促成中央收回「一國兩制」白皮書、喺「八三一」以外框架重啟政改,並且唔會強行禠奪民選議員嘅議席等。民主黨(白鴿黨)涂謹申明言冀望林鄭可以修補社會撕裂。與此同時,專業議政七個立法會議員亦都去信約見林鄭,希望就各項公共政策交換意見。

比起上次特首選舉,民主派一開始已經旗幟鮮明反對特首梁振英,態度明顯放軟。

對於傳統泛民對林鄭「留手」,激進自決派似乎唔多支持,香港眾志羅冠聰、劉小麗、朱凱廸及社民連梁國雄等都無參與聯署。有民主派中人估計自決派唔參與係因為其「反林鄭」立場。講到尾,今屆議會民主派明顯唔同以前咁團結,究竟會唔會走向分裂,大家拭目以待。

第一手消息請下載on.cc東網iPhone/iPad/Android/Windows Phone Apps