政情：王桂壎接手通訊局燙手山芋
尋日政府公布委任香港律師會前會長王桂壎做通訊事務管理局主席，接替何沛謙，任期由今日開始至一九年三月三十一日。何沛謙在任時處理過唔少燙手山芋，如增發免費電視牌照、亞視「熄機」等等。未來又要再面對類似問題，唔知王桂壎搞唔搞得掂呢？
現擔任多項公職
除咗通訊局外，王桂壎依家亦擔任緊版權審裁處主席、競爭事務委員會成員等多項公職。佢喺五年前仲曾經參選過立法會，挑戰法律界議席，當年雖然獲得唔少親建制嘅法律界人士提名支持，不過可惜以近六百票之差落敗。
律師會另一位前會長熊運信亦獲政府委任為通訊局新成員，仲有羅盛慕嫻、盧瑞盛、鄧國斌同徐岩教授，任期同王桂壎一樣係兩年。另外，政府尋日都委任咗七人做房屋委員會成員，包括陳家樂、彭韻僖、鄭慧恩、盧麗華、立法會議員柯創盛、邵家輝同埋尹兆堅。再加埋之前啲委員，房委會依家有晒唔同黨派嘅議員，就唔怕被人話偏頗喇！