中環出更:教界領袖論訓練營有讚有彈

早前領袖訓練營接連爆出醜聞,令人質疑有無舉辦嘅必要性。尋日教育大學頒發榮譽院士學位,表揚四位對教育作出貢獻嘅傑出人士。前立法會議員林大輝係其中一位得主,佢認為學生要學習獨立,所以接受多元化培訓係好事。不過創辦免費補習社嘅陳葒就批評有關訓練只會令學生變得固執、倔強。

林大輝話,學生要有全人健康發展,唔可以只着重學術成績,所以運動、獨立等範疇都不容忽視。講到坊間嘅訓練營,佢就質疑單靠一次活動唔能夠培育出領袖才能,但係有不同活動培訓學生全面發展並非壞事咁話。

陳葒強調要因材施教

「陳校長免費補習天地」創辦人陳葒就對出事嘅領袖訓練營有強烈意見,強調要因材施教,顧及學生需要同性格。不過,佢講起獲頒榮譽院士時就即刻收火,仲話個榮譽係「屬於大家」,事關有多名義務老師共同付出,認為自己只係代領啫!

獲頒榮銜嘅仲有聖保羅男女中學校長兼附屬小學校監陳黃麗娟,以及創辦國學基金會嘅馮燊均。從事教育工作多年嘅陳黃麗娟就指出,現時教師嘅工作量比以往大增,因為政治議題進入校園,而且單親家庭數目增加,令到社會情況較為複雜,學生問題亦多咗,所以教師亦都要着手跟進其他問題囉!

中華廠商聯合會副會長吳宏斌都有到場支持林大輝,講起學生喺香港升學定係出國留學好,佢就話喺香港讀書有助了解中國,而到海外讀書就有助擴闊國際視野,各有優點喎!

卓妮

第一手消息請下載on.cc東網iPhone/iPad/Android/Windows Phone Apps