話香港地都市炸彈四伏，真係一啲都冇誇張。除咗黑心食品長爆長有，冧樹冧招牌冧樓層出不窮，連搭扶手電梯都隨時可能中招，市民真係要打醒十二分精神。
旺角商場扶手電梯行行吓突然打倒褪，導致最少十幾人受傷，係近年最嚴重嘅扶手電梯事故。睇番事發片段，啲人十足十打保齡咁跌落嚟，唔知嘅仲以為係內地經常發生嘅「食人電梯」事件吖。講真，涉事扶手電梯橫跨幾層樓，有名你叫「通天梯」，冇搞出人命只係好彩嘅咋。不可不知，家陣人手一部智能電話，個個都係「低頭族」，出起事上嚟分分鐘人疊人，唔係講玩o架！
咁機電工程署又點講呢？佢哋話初步調查發現扶手電梯嘅驅動鏈損壞，導致制動裝置未能生效；又話已經要求全港註冊自動電梯承辦商喺一個月內，為垂直提升高度超過十五米嘅扶手電梯進行特別檢查，並提醒承辦商加強日常維修同檢測喎。
講就好聽喇，其實呢啲都係例牌官話，敷衍民意嘅啫。好似涉事扶手電梯咁吖，今年一月先至通過年檢，出事前兩日亦進行過例行檢查，連過兩關居然都冇發現問題，擺明係走過場喇。機電署官僚懵到上心口，旨意佢哋幫市民把關，蚊都瞓蛇都死，依家仲要將個波一嘢掟畀承辦商，叫市民點有信心？
家陣最令人擔心嘅係，全港仲有幾多類似「通天梯」？仲有幾多隱而未見嘅安全隱患？仲有，今次涉事承辦商嘅規模喺香港已經數一數二，其他等而下之嘅公司，安全豈非更無保障？呢嗱，每日有幾多人乘搭扶手電梯好難估計，但以升降機每日載客三千萬人次計算，斷估唔會少得去邊，質量把關絕對唔可以鬆懈。
講開升降機，可以話係都市炸彈嘅又一重災區，耐唔耐就整劑高空墮（車立）意外，市民簡直一步一驚心，而負責安全監管嘅機電署官僚又係平日唔燒香，臨急抱佛腳，次次都要等到爆大鑊至賊過興兵，唔係上演巡查大龍鳳，就係話引入計分制，完善承辦商評級制度，點知過一排又係冇晒下文，唔出事至奇喇。大家應該記得，兩年前慈雲山發生車房大爆炸，機電署長期以來對石油氣車輛維修無監無管，正正係主要原因。所以話，咪睇機電署衙門細細，職責所在關乎市民身家性命財產，官老爺麻痹大意，死得人多都似！
冇符喇，呢個政府冇神經，連班官都冇心冇肝，胡混度日，搞到市民連搭升降機同搭扶手電梯都要提心吊膽，連出入平安都成為奢望，所謂「民生無小事」，根本就係得啖笑！