政情：創新慶周年 陳郭詩慧帶員工睇演唱會
港人愛新鮮，同一樣嘢做多幾次都會厭，更莫講一啲同化妝或時尚有關嘅行業，淨係追趕潮流絕對唔夠，仲要不斷有新意。早排我哋見到香港化妝品同業協會理事長陳郭詩慧（Melody）同埋好姊妹「鮮花公主」龔嬿（Yvonne），講起工作，做化妝品生意嘅Melody就話今年公司唔搞周年晚宴，轉為舉辦演唱會，希望啲員工鍾意咁話。
龔嬿睇準為食上班族市場
講起過往周不時有好多大大小小Ball場活動，但近一兩年數量明顯少咗，除咗因為經濟影響之外，要不斷搵新意都係一個挑戰。Melody見周年晚宴都舉辦咗咁多年，而適逢佢公司今年四十周年，就諗不如搞搞新意思，舉辦慈善演唱會代替。佢仲話當晚全部舖頭會關門，二千幾個員工一齊去伊利沙伯體育館睇演唱會，絕對係新嘗試。
同樣係職場叻女嘅Yvonne工作上亦非常認真，除咗鮮花裝飾、珠寶同時裝生意外，近日仲做埋日本活蟹生意，佢見蟹嘅分量大，仲諗到用蟹嚟拆肉做便當，專攻為食上班族食晏時間，真係百足咁多爪。