政情：公投失敗收場戴耀廷玩自爆

「雷動計劃」 早有前科

喺佔領行動清場後，戴耀廷依然唔收手，喺舊年立法會選舉期間提出「雷動計劃」，揚言可透過指揮一班所謂嘅「智慧選民」配票，協助泛民候選人取得最多議席，點知結果失敗收場，多名資深泛民議員因不獲雷動配票或有人過度配票而落選，益咗建制派。

但係戴耀廷仲未知衰，又發起特首公投，但公投計劃連番甩轆，包括被揭手機投票程式有私隱同保安漏洞，被個人資料私隱專員公署指涉違例叫停，嚇怕唔少想參與投票嘅市民。再加上大部分泛民選委因種種政治盤算，根本就唔會被公投結果綑綁，結果三百多名泛民選委當中，只有幾十人承諾會根據公投結果投票，而投票嘅市民極少，同計劃目標嘅一百萬人相距甚遠。

尋日特首選舉投票，佢竟然自爆投票準則係「最能拉近達到真普選為選擇候選人」，又鬼拍後尾枕咁話民投只係為咗達到目標所採取嘅策略，而選舉策略冇人知係啱定錯，當中唔單止考慮政綱原則，仲有選情因素。

佢仲解釋話雖然鬍鬚曾冇話放棄人大「831」嘅決定，但可以喺冇前設下重啟政改，而邊個當選都要爭取真普選。面對林鄭可能要抗爭，鬍鬚曾就可能透過商討，佢覺得鬍鬚曾當選嘅話，較大機會達到真普選。

戴耀廷全部都只係策略，咁即係話佢搞特首公投都只係為咗達到自己嘅目標，諗住透過眾籌去搞公投，以公投去製造鬍鬚曾民望同支持度高嘅假象，再去氹泛民落疊。

泛民卻步 削認受性

之不過，泛民令次唔受氹，早就唔肯積極為公投計劃宣傳，導致投票人數極低，變咗公投結果毫無公信力，再加上戴耀廷原本希望眾籌一百五十萬元作為計劃經費，但最終籌到嘅款額都唔夠一半，最後可能唔夠錢找尾數添！佢呢次都係失敗收場喇！