古人話︰「寧可食無肉，不可居無竹」，原本意思係叫人追求高雅生活，不過對香港人嚟講咯喎，港產官僚把關不力，後知後覺，搞到食安危機長爆長有，都係食少啲肉穩陣啲！
冇錯嘞，功夫茶講緊嘅，咪就係近排搞到人心惶惶嘅巴西致癌腐肉囉。自從事件揭發以來，當局淨係禁止入口巴西生產嘅冷藏及冰鮮肉類以及禽肉，但又做啲唔做啲，禁入口唔敢買賣，對於市民要求全面回收，當局藉口多多，唔係賴「掌握資料有限」，就係話要等巴西當局調查結果，一味耍手擰頭，喺巨大民意壓力之下，食物及衞生局局長高永文終於跪低，宣布維持入口禁令之餘，即時回收市面來自廿一間被巴西當局調查廠房嘅凍肉。
呢啲咪唔見棺材唔流眼淚囉。大家有眼見，自從巴西肉出事之後，唔少商戶主動下架，相對港產官僚踢一踢至郁一郁，邊個有良心，邊個麻木不仁，相信唔使多講。家陣冇市民病從口入猶自可，萬一官府遲遲唔回收黑心肉搞到爆大鑊，呢隻鑊官老爺點孭得起？
官老爺反應慢九拍都算嘞，最衰仲係死雞撐飯蓋。高永文係咁講嘅，今次巴西腐肉問題係因為巴西當局發現食品商貪污行賄，而唔係個別批次肉類生產或程序出問題，所以早階段處理上有困難喎。正如有立法會議員話齋，家陣肉食入口多數由海路經碼頭抵港，照計冇理由追蹤唔到來源同流向，點解次次出事港府都要靠零售商提供資料，市民出咁多錢請呢班食安官僚做乜？仲有吖，應對今次巴西黑心致癌肉問題，歐盟、南韓甚至內地當局反應都比香港快好多，港產官僚又點解釋？
講起真係火都嚟埋，本港食品源頭追蹤機制形同虛設，早就備受詬病。由年前嘅地溝油，到快餐店過期肉，到問題大閘蟹，再到依家巴西「黑心肉」，食安官僚幾乎次次都係傳媒揭發後至急急補鑊，市民有得震冇得瞓，認真多得佢哋唔少。
問題食品長驅直進，如入無人之境，官老爺監管不力，掉以輕心固然係主要原因，亦有人批評當局為免業界反彈，好多時遲遲唔肯回收問題食品。冇錯，商戶蒙受損失的確值得同情，但食品安全人命關天，市民健康幾時都唔可以妥協！
講嚟講去，市民無啖好食，主事官員難辭其咎。雖則夕陽政府進入倒數階段，但唔代表官員可以hea做等收工。高永文話自己鍾意做醫生多過做官，但唔該點都站好埋最後一班崗，咪諗住可以懶懶閒關人個關吖！