政情：性情中人 楊岳橋大開黃腔
情與性，密不可分，但都市人談情容易，談性卻避忌。立法會議員楊岳橋尋日出席性文化節活動時，尺度大開，不但大膽談性，仲自爆選舉時唔會禁慾，又話男女性事要「出汗先感受到愉快」喎！
指香港社會風氣保守
楊岳橋可以話係黃腔一開，有味笑話講不停，佢話，唔會好似運動員咁喺賽前禁慾，即使選舉期間都一直維持正常性生活。講完個人，佢又好大膽咁將「金槍不倒 堅韌持久」嘅高帽畀性文化節嘅搞手戴。
佢又批評香港社會嘅性風氣保守，官方性教育課程已沿用近二十年，過晒時，「仲用緊ICQ識女仔做例子！」嚴重窒礙下一代「識性」。至於一般港人，佢又慨嘆香港人壓力大，連性愛都冇時間。咁都未完，佢仲親身試着「孕婦裝」，體驗懷孕卅四周嘅重量，甚至喺參觀時揭開展品裙底，一啲都唔怕醜。