中環出更：華富邨外星傳說 吳秋北拒信
華富邨係香港第一條公共屋邨，已經有五十年歷史，而該邨最廣為人知嘅，相信就係三十幾年前居民集體見到不明飛行物體（UFO）嘅事件。工聯會理事長吳秋北就話對呢件事聞所未聞，而佢一向都唔多相信UFO同鬼怪。不過，佢就話既然美國羅茲威爾都因為UFO而吸引唔少旅客，華富邨可以借呢宗傳聞去發展旅遊喎！
自認理性大膽
尋日喺華富邨見到吳秋北，佢話無聽過華富邨曾出現過UFO，但就得悉其他地方有類似情況，不過佢冇興趣去探究，事關佢自認理性，過去唔少UFO出現嘅傳聞，多數最終都會有線索去證明係虛假，加上自己從未見過UFO，所以咪唔熱衷囉！至於話華富邨可以借此發展旅遊，都係講笑啫。
講開古靈精怪嘢，吳秋北又話自己大膽，細細個已經夠膽喺夜晚獨行鄉郊，而朋友講鬼古時反而覺得「得啖笑」唔會驚，所以好少接觸鬼古事同驚駭電影，因為佢聽咗孔子話，要「敬鬼神而遠之」喎！
卓妮