吃？還是不吃？對着雪藏的兩磅巴西雞翼，老朽內心猶豫交戰，終於還是狠心丟掉算了，食求安心而已。巴西當局揭發肉類工廠涉出售添加致癌化學物掩飾嘅腐肉，涉案嘅二十一間「黑心」肉商名單，據云有五間供港。巴西係香港最大凍肉的進口地之一，去年進口凍肉六億公斤，貨值達一百一十億元。大部分快餐連鎖店及茶餐室都難免會用巴西凍肉。
為了免食客擔心，不少大連鎖快餐店自動停售有關巴西凍肉的產品，這是十分明智的決策，皆因事件發生成六日，食安中心及有關當局只暫停巴西凍肉入口，不回收又不禁售，市民十五十六，每日誠惶誠恐，買咗嘅唔知係咪來自黑心肉商；官僚就話唔回收主因係掌握資料有限，包括甚麼公司和甚麼批次也不知。阿哥，難怪網民寸爆有關官僚：黑心肉，半年後清完貨，就話無法跟進；香港真係冇掩雞籠，食品可以任入口，一出事乜都冇人知，真係自求多福咯！
據悉零售商比政府有關部門更早掌握了巴西五間黑心肉商資料，並按名單自行核對有否「中招」。看來，食安中心被轟後知後覺慢幾拍不是無的放矢；有議員指巴西應盡快提供明確出口紀錄，港府亦應按名單追查，令市民安心。
問題係港產官僚把關不嚴，出事了，又求其不切實補鑊，「掌握資料有限」不是藉口，明明可以按名單追查又唔肯做。其實查證冇事，畀張證明，市民買時就不會揪心，如今當局雖然冇話禁售，相信市民仍不會放心買巴西凍肉。
見微知著，回歸後香港之所以沉淪不振，政府冇靈魂是主因，「冇資料」就任由你哋自己發揮，丟掉或吃掉；賣或唔賣，權在你哋唔關我事！唉。「資料太多」又話要時間分析，地老天荒都未曾檢控一眾佔中搞手。完全違反古人所說「有害於民者，則當拔其本、塞其源」的至理，香港之所以群魔亂舞，港產官僚難辭其咎也。