政情：冇胃病照食藥 丁志輝當保健
香港人工作緊張、食無定時，腸胃不適好普遍。做中成藥生意嘅香港中醫藥管理委員會委員丁志輝就話自己冇胃病，但都日日食自家嘅胃藥，當係調理喎！冇事卻長期食藥，得唔得（口架）？
稱中成藥劑量少 唔怕傷身
丁志輝笑稱，佢食嘅胃藥係中成藥，而且食嘅劑量少啲，所以唔怕傷身。雖然佢冇胃病，但係平時食得應酬飯多，工作又緊張，其實腸胃嘅消化能力都會差啲，所以食定胃藥實冇錯喎。
講到有病究竟食西藥定中藥好，佢就話中醫中藥一向注重保健同調理，而且副作用少，所以如果為咗調理同保健，佢認為寧願食中藥好啲。不過，若果係急性重病，梗係要食西藥快趣啲喇！