政情：林奮強當年辭任行會 今日擸三公職
政府尋日公布醫院管理局、強制性公積金計劃管理局及強制性公積金計劃諮詢委員會等多個公營機構及委員會新一輪嘅任命。其中前行政會議成員林奮強就被委任為醫管局成員，任期由下個月一日起，為期兩年。雖然林奮強冇得做行會成員，但就多次被委任公職，已經先後加入咗香港機場管理局和大嶼山發展諮詢委員會。咁樣算唔算跌咗個橙、執番個桔，攞番個安慰獎呢？
偷步賣樓風波後轉搞智庫
尋日政府宣布委任八位醫管局成員，其中六位為現任成員，兩位係新委任，林奮強就係被委任嘅新成員之一。二○一二年今屆政府上場，特首梁振英就委任地產分析員出身嘅林奮強為行會成員，不過後來爆發偷步賣樓風波，佢喺政府推出辣招壓抑樓價前，接連出售兩個豪宅單位，雖然廉政公署經調查後還其清白，但林奮強都係決定辭去行會職位，佢做行會成員只係一年左右。
林奮強沉寂一排之後不時以智庫「黃金五十」創辦人身份，對政府施政、社會政策發表意見。例如社會討論新界北發展時，佢就話香港未來二、三十年將會非常悲慘，除咗人口老化外，樓宇亦老化，居住環境將一直惡化落去，社會不應該將發展「妖魔化」。佢亦多次批評政府過去十幾年一間醫院都冇起過，醫生人手持續緊張，甚至形容香港醫療體系瀕臨崩潰。佢仲建議過政府效法新加坡，設認可醫學院名單，免試輸入外地醫生，改革以醫生主導嘅醫務委員會云云。
唔知係咪咁，政府先委任佢入醫管局，聽吓佢有咩高見呢？但輸入海外醫生一向都係具爭議嘅議題，如果聽佢講，都唔知係幫政府，定畀個炸彈政府喇。
梁繼昌做強積金委會成員
另外，會計界立法會議員梁繼昌（Kenneth）被委任為強制性公積金計劃諮詢委員會成員，任期由本月底至一九年三月廿九日，似係接替前民主派成員李華明。Kenneth繼獨立監察警方處理投訴委員會後，再次被委任公職，唔知今次會唔會好似喺監警會咁，做足三屆六年任期呢？