中環出更：環保侯志強 睡床瞓夠一百年
政府日前公布垃圾徵費計劃，唔少人都認為喺鄉郊實行有一定困難。上水鄉事委員會主席侯志強就話惟有減少換傢俬，用到變古董，為環保出一分力，仲揚言屋企張睡床要「瞓夠一百年」喎！講講吓，佢自爆家中睡床由結婚用到依家，因為瞓到風生水起所以唔肯換，仲話阿爺教落唔好換床，難怪佢話要瞓夠一百年喇！
侯志強話鄉村嘅配套設施一向都差，好似街燈、道路、化糞設施都冇，直言新界人好似被政府遺忘咁。所以如果處理垃圾都要收錢，相信村民唔多願意配合。
邱榮光撐垃圾徵費
不過，鄉議局環境及衞生委員會主任委員邱榮光就有唔同睇法，佢話曾喺兩條村搞垃圾徵費試驗計劃，垃圾量真係少咗，所以會逐步擴大計劃。但佢就覺得政府同時要做好回收工作，可以考慮喺每條村設廚餘收集站，因為廚餘堆肥喺鄉村都有好大需求。
卓妮