中環出更：陳曦齡養生之道追住太陽瞓
講起養生之道，中醫成日教人夜晚十一點、即「子時」前要瞓覺，但香港人生活愈夜愈精彩，相信好多人都做唔到。由西醫轉做中醫嘅健靈慈善基金主席陳曦齡（Helen）早前出席「養心匯」午宴，同一班城中政商界名媛分享健康貼士時就話，做人要「追住太陽嚟瞓」，依家進入春夏時節，因為太陽早啲升起、遲啲落山，所以可以晚睡早起喎！
咦？可以晚睡咁正？Helen笑笑口話，晚睡嘅意思都係唔超過十一點。不過香港真正踏入子時係十一點廿四分，所以大家可以夜少少先瞓喎！講番點樣追住太陽嚟瞓，Helen話秋天要早睡早起，冬天太陽伯伯遲起身，大家亦可早睡晚起咁話。
善德基金會主席董吳玲玲就分享香港女性嘅家國情懷，佢細數自己祖父如何喺海外辛勤工作，為建設家鄉不惜血汗，乃至佢隨父親移居香港嘅奮鬥史。董太感觸話，香港有今日都係因為上一代嘅努力，所以奉勸年輕人要珍惜。
香港耀能協會董事彭徐美雲就話，女士要工作又要照顧家庭，殊不簡單。當兩個仔仲細嗰時，佢就堅持每朝開車送仔返學，風雨無阻，所以依家母子感情好好，可能係當時建立嘅關係。
行山一群人 張心瑜唔怕賊
同場仲有仁愛堂前主席張心瑜及前總理毛麗佳，佢哋都好鍾意行山。話時話，最近警方喺行山熱點派發單張提醒小心劫匪，唔知佢哋怕唔怕呢？張心瑜笑稱佢哋通常好多人一齊行，都唔會行僻靜嘅地方，所以唔驚嘅。
卓妮