大橋配套又延誤 香港速度醜死怪

正所謂,一件污,兩件穢,三件冇所謂。港珠澳大橋香港段工程一波三折,好事多磨,甩轆多過食飯,市民早就聽到麻木晒,呢嗱,話口未完又嚟喇!

今次出現延誤嘅,係屬於大橋配套工程嘅屯門至赤鱲角連接路,原本南北段分別預計今年年底以及明年通車,最新消息係北段工程要到一九年上半年完工,南段更加延誤至二○二○年。查實有關工程舊年已經傳出延誤,當時路政署官僚賴得就賴,又話海底隧道鑽挖工程「水深石硬」,又話機場航道限制施工,今次更加索性將個波大腳傳中畀承建商,強調對方遲遲未提交海底隧道走線修改方案,導致兩部鑽挖機停工,講到好似完全事不關己,卸膊成咁,真係唔到你唔服。

咪以為連接路唔係大橋主體工程一部分,延誤好閒事,正如專家話齋,連接路係來往大嶼山同機場嘅替代通道,工程一日未搞掂,即使大橋如期今年底通車,由於大部分人仍要沿北大嶼山快速公路出入香港市區,完全起唔到分流作用,成條大橋等於廢咗武功。

家陣工程延誤已成定局,大家最關心嘅係會唔會再超支?官老爺拍晒心口,話應急費「綽綽有餘」,唔擔心要追加撥款,仲話承建商拖延工程會影響之後競投其他政府工程添。大家聽住先好喇,你知喇,路政署官僚之前隱瞞人工島飄移以及海堤崩塌等,劣迹斑斑,直頭係信佢一成,雙目失明嗰隻。連接路最終會唔會超支收場,仲要睇過至知,但最令人擔心嘅係,大橋香港段整體工程埋單計數分分鐘過千億元,一旦港府再向立法會追加撥款,連建制派都講明唔會輕易放行,到時都唔知點收科。

唔怕唔識貨,最怕貨比貨,隨着大橋通車日期臨近,內地同澳門已經進入安裝交通工程橋面設備嘅最後大直路,唯獨香港段問題愈揭愈多,港珠澳大橋貴為國家級重點工程,更被譽為「世界新七大奇迹」之一,全世界金睛火眼(目及)到實,家陣居然畀香港拖後腿,你話係咪累街坊吖。路政署署長上星期帶隊視察內地段大橋工程,對沉管預製生產過程以至質量等讚不絕口,「高度認可」,呢啲咪珠玉在側,覺我形穢囉!

一滴水可以睇清楚整個世界,一條橋亦可以睇清楚香港嘅衰落。曾幾何時,香港速度係效率同質素嘅保證,地鐵等大型基建更被內地奉為「教科書」,依家風水輪流轉,講起都一殼眼淚。國家領導人早排警告,深圳兩年內將會超越香港,計功夫茶話齋,香港繼續不思進取,莫講話畀深圳爬頭,遲早連二、三線城市都不如吖!