政情：公民講場：港台冇新大樓用 阿Greg貓哭老鼠

港台節目最近被指質素欠佳，港台工會就歸咎係政府給予嘅資源不足，包括遲遲未能興建新大樓畀港台用。商務及經濟發展局局長蘇錦樑（阿Greg）尋日回應話，政府已盡量畀資源港台，無奈上屆立法會否決撥款興建港台新大樓。佢又話新大樓造價會隨時間上升，係艱難嘅工作。其實新大樓撥款當年不獲通過，負責游說拉票工作嘅阿Greg絕對難辭其咎。而既然佢知道大樓造價會隨時間上升，就更應該盡早重推一個新方案上立法會，但佢好明顯冇咁做到。有關言論唔係廢噏就係貓哭老鼠，好彩佢任期得番三個零月啫！