政情：智慧香港扶輪社教長者IT
香港成日自詡係國際城市，但係好多科技應用都跟唔上時代步伐。智慧香港扶輪社秘書陳家豪（Emil）慨嘆，香港科技發展日趨緩滯，未來不外乎兩條道路，一係就跟上潮流發展成智慧城市，一係就繼續停滯不前，不過若揀後者，咁遲早會變成「歷史名城」喎！
陳家豪批港科技政策落後
Emil話，政府嘅觀念好守舊，好多科技新事物政策制訂仍然欠奉。例如香港嘅電子證書同支付系統，處於十分落後嘅水平，話唔定將來出現憑腦電波認證進行交易時，香港仲係要使用現金。
由於太睇唔過眼，Emil同一班IT人早前成立智慧香港扶輪社，期望憑科技專業為社會出一分力。智慧香港扶輪社顧問洪文正就話，佢哋其中一個服務方向係教長者點應用資訊科技，事關香港想躋身智慧城市，就必須令資訊科技普及化。