政情：周詠琁倡唱歌當全民運動
香港婦協名譽會長兼靚女高音歌唱家周詠琁（Charlene）最近去咗歐洲一個月，期間穿梭意大利、葡萄牙及奧地利三個國家合共六個城市表演，不過佢返港後唔止毫無疲態，仲瘦咗靚咗添！Charlene笑笑口話，唱歌可以鍛煉肺活量，係一種好好嘅運動，所以佢好讚賞日本人鍾意唱卡拉OK，希望香港都可以推廣唱歌當係全民運動。
Charlene仲透露一個秘密，就係佢只要有演出時，成個人嘅新陳代謝就會好啲，若冇表演就精神差啲。所以坊間講嘅音樂療法，除咗醫治心理及情緒疾病之外，其實對身體都有莫大好處。
歐遊鍾意奧地利
講到今趟歐遊嘅趣聞，Charlene話最鍾意音樂氛圍濃厚嘅奧地利，其中有一間著名嘅百年食肆，店內嘅布置充滿藝術氣息，連廁所都靚到令人嘆為觀止，結果佢嘅男女團友竟然拎起手機拍廁所視頻互相分享，好搞笑。