廉政公署等紀律部隊薪高糧準，一向被視為筍工，立法會議員林卓廷（阿廷）就做過廉署調查主任，由於太多人問佢投考廉署嘅心得，所以早前佢就免費開班益街坊。阿廷話，好多人投考廉署時都會被英文即時演講難倒，佢就畀咗幾個貼士，仲話係「袋錢入大家袋」喎！
阿廷話，英文即時演講通常先由應徵者抽出一個英文字，然後用該字演說五分鐘。唔少人因為唔識個字或吹水能力不足而衰咗。佢就教路，若唔識個英文字時其實可以問考官，咁顯示應徵者不恥下問，反而有得加分。至於重要嘅社會議題走唔出「廉潔」、「貧富懸殊」等，應徵者可預先寫定四十至五十篇範文，到時臨場講番就會較為言之有物。
阿廷仲話，呢一招係佢必勝策略。至於體能及其他面試，其實好易過關。阿廷笑稱，自己如果要收錢開班教投考心得，相信開價三千蚊都會有人報名，所以真係益街坊o架！