政情：何君堯叫民主派有病睇醫生
立法會民主派議員拉布已經成為常態，就好似近期審議逾百億元基本工程儲備基金整體撥款，民主派為了反對當中的橫洲發展項目，就由工務小組委員會審議撥款開始一直拉布，拉到近日財委會，搞到建制派議員扯晒火。其中身兼律師的建制派議員何君堯就在尋日財委會上義正詞嚴狠批民主派拉布，更用上「經期」去形容，叫班民主派議員「有病就去睇醫生」，唔係去報警，認真好火。
民主派因不滿有關撥款申請綑綁橫洲發展項目，連番在會議上拉布，雖然尋日開咗六小時會議並通過有關撥款，但就經歷民主派議員提出中止待續及休會動議，審議進度非常緩慢。何君堯質疑議員重複拉布，係因為有「橫洲心魔」而重複使出「拉布五部曲」，分別係「『打爛沙盆問到篤』、提出臨時動議、休會、中止待續議案，最後就係『核子彈中止會議待續』」。佢狠批民主派手法千篇一律、周而復始，質疑泛民主派係「心中有鬼」。
向來語出驚人嘅何君堯更有偉論，竟然用上「經期」去形容目前拉布情況，稱「有人出咗血就以為有人加害佢，原來係每月嘅經期」，強調出血同遭受加害係兩回事，所以促請有關議員「有病就去睇醫生，唔係報警」，疑似批評議員朱凱廸早前以生命及家人安全受威脅去報警一事囉！
中途離場參加荃議辦開幕禮
不過，「長命會議」未開完，何君堯就於中午時分離開立法會，去荃灣主持其新議員辦事處開幕，佢仲喺致詞時主動申報中途離開會議，強調切完燒豬就會急急腳趕返去立法會投票。
何君堯更把握機會，向主禮嘉賓之一、升呢冇耐的勞工及福利局局長蕭偉強算帳。佢話初頭都同意為「長者生活津貼」設立資產審查，但後來因憐憫之心，認為所有年屆七十歲的香港長者都應該可獲津貼，除了因為香港長者已服務香港多年，更毋須擔心將來老年化為新一代年輕人帶來負擔。
剪綵過後，何君堯就叫所有嘉賓都將綵帶剪下一小段作保留，當作袋住「彩頭」，夠晒新意。佢仲話，今年年頭先開始呢個習慣，再喺彩帶上寫低日期同活動放入日記簿內，講笑話可以累積彩池喎！