中環出更：黃國健 柯仔食碟頭飯唔怕鈉超標
立法會議員經常一日趕幾場，食飯都係秒速扒咗碟頭飯就算。不過早前消費者委員會踢爆，坊間受歡迎嘅碟頭粉麵飯鈉含量超晒標，真係唔食好過食。但係立法會議員黃國健同柯創盛（柯仔）都懶理，黃國健話最愛涼瓜肉片飯，好難唔食，柯仔就鍾情被喻為「男人的浪漫」嘅豆腐火腩飯，直言雖然知唔健康，但「死就死喇」咁話喎！
黃國健話四十歲後就開始食涼瓜，愈食愈鍾意，以前食開涼瓜牛肉飯，但依家啲牛肉唔多靚，所以改食涼瓜肉片飯。咁驚唔驚鈉超標？佢就話有留意消委會報告，但食開好難唔食。
覺得快靚正
至於柯仔就話，平時食飯唔係豆腐火腩飯就係粟米斑塊飯，覺得碟頭飯「快靚正」。佢又話依家好多食物都唔健康，好似公仔麵咁，但一個大男人若只係食沙律嘅話又唔夠飽，所以都會繼續食「男人的浪漫」，唔擔心得咁多。
卓妮