中環出更：營商有法 名人無懼韓政局不穩
最近港人外遊嘅熱門地點南韓政局不穩，唔少人都好關注。早前喺保良局周年慈善餐舞會上，卓妮同一班商界名人講起呢個話題，「美容教母」鄭明明就話，早排從南韓買入一批面膜後就冇再入貨，加上主要貨源來自歐洲，所以南韓局勢對其生意影響不大。
做鐘錶及名牌衫生意嘅總理陳正欣（Daniel）都話，其生意夥伴主要來自歐洲，所以影響有限。佢仲分享營商貼士，稱自己主要與歐洲大企業合作，大企業有經驗同口碑，亦有悠長歷史背景，萬一當地政局不穩，呢類公司都有足夠能力應付而令減少影響。
Daniel嘅生意雖然同南韓冇關，但佢都好掌握當地情況，認為南韓除咗總統下台之外，近期亦因布置導彈問題，連帶當地旅遊業都受牽連。睇嚟從商除咗要有眼光同膽識，亦都需要密切留意世界大事，先可減少損失。
鄭明明堅持親身試用貨品
同場仲有保良局候任主席陳細潔同埋胞姐劉陳小寶，講到營商之道，佢哋都話留意時事係做生意嘅基本要求，亦應避免只同單一地區公司合作以降低風險。至於鄭明明就強調，營商應該誠信行先，所以佢堅持所有貨品都親自試過先，又話自己累積咗五十年經驗，能夠憑肉眼睇出他人皮膚問題，所以特別留意身邊人士嘅樣貌喎！
卓妮喺另一活動見到中電企業發展總裁莊偉茵，佢就話南韓經濟近年表現相當唔錯，尤其係科技發展，若連串事件重挫當地經濟就好可惜喇！
卓妮