北京兩會啱啱閉幕，國家領導人有句告誡港人嘅soundbite係咁嘅：「整天去玩政治，不就是把自己玩死了？」話口未完啫，被視為反對派大本營嘅香港大學排名又跌嘞，想唔話係開口中都唔得啦。
英國《泰晤士高等教育》公布今年亞洲大學排行榜，香港有六間大學位列前五十名之內，當中港大同科大仲係十大之列添，分別排第五同第六。表面睇，好似好威水喎，其實虛火嚟嘅咋，事關港大排名持續向下，由去年第四跌落第五，已經第二年下跌，科大亦只係力保不失咋。反觀排第一嘅新加坡國立大學及第二嘅中國北京大學繼續屹立不倒，蟬聯亞洲一二哥位置，清華大學仲叻仔，兩級跳彈到去第三位。
嗱，呢個調查係根據每間大學嘅教學、研究、論文影響、國際表現及知識轉移收入等五大範疇進行評分，正如調查人員話齋，其他大學進步神速，港大原地踏步，排名咪係咁跌囉。咁又係呀，逆水行舟，不進則退，好似北京大學同清華大學咁，以前榜上無名，近年愈戰愈勇，你估撞彩嘅咩，人哋大力推動科研，廣納名師，不斷求進，點似得港大師生一味沉迷政治鬥爭咁墮落吖。
唔係咩，自從佔領之亂開始，港大校園高度政治化，部分教師不務正業，誤人子弟，甚至鼓勵違法；部分學生無心向學，將街頭鬥爭一套搬入校園，唔係圍堵校委，就係批鬥師長。當校園容不下一張安靜書桌，亦容不下一間安靜嘅科研室，學術成績及國際排名跌跌不休就係必然結果。
有辦你睇，台灣藍綠政爭無日無之，大學生又癲埋一份，一時搞佔領，一時搞學運，結果大學排名亦係每況愈下，今年更加係近五年來首次冇大學打入二十大，原因係咩，畫公仔唔使畫出腸喇。反而出名威權管治嘅新加坡同內地，大學成績名列前茅。嗱嗱嗱，呢個排名唔係內地搵人做o架，反而係港人最崇拜嘅英國人做嘅，證明冇偏頗啦，事實擺在眼前，唔通唔值得香港人反思咩？
即係咁，爭取民主冇人話唔啱，年輕人有激情亦唔係錯，但都要適可而止吖。大學係作育英才嘅地方，讀書同教學係本分，連本分都未搞掂就走去搞政治，結果咪玩死自己囉。呢，尋日審結嘅旺角暴亂案，三個後生仔被判暴動罪成，其中一個就係港大學生嘞，你話係咪令人心痛吖。
冇計喇，人哋一心一意謀發展，香港就專心致志搞鬥爭，點會有前途o架，點會唔倒退o架，港大嘅遭遇咪就係香港嘅縮影囉，一句講晒，唔通政治真係可以當飯食咩！