政情：張仁良憶史立德肉帛相見

張校長話雙方喺多年前參與伙伴倡自強委員會嘅時候相識，當時史立德推動就業機會畀弱勢社群嘅努力，令佢印象深刻。其後佢轉換工作環境，同史立德少咗接觸，直至一次佢喺馬會會所游水，喺更衣室遇見史立德，當時兩個人冇乜點着衫，着咗衫反而唔認得對方！冇乜點着衫，即係肉帛相見喇！

演講廳命名作生日賀禮

對於今次史立德對教大嘅捐助，張校長話好感激，仲特登揀喺史立德牛一嘅日子，將校園內一所演講廳命名為「史立德伉儷演講廳」，務求畀對方一份難忘嘅生日禮物。

史立德就話今次演講廳命名，令佢以後嘅生日都會記得教大。佢又話自己身為僱主，有時睇見大學生所寫嘅信件就會皺眉頭，事關佢覺得時下嘅大學生水準的確唔及舊時，所以佢寄望教大能夠培育良好師資，冀能帶動提升整體學生嘅水準。