政情：「達文西」助趙偉仁繪畫
仲記得舊年中大醫院三十五周年晚宴上拍賣嘅一幅花鳥國畫令人印象深刻，事關係助理院長趙偉仁教授同校長沈祖堯首次合作，趙教授繪畫，而沈校長就喺上面題字，相隔半年，趙教授再有新猶，近日就用微創手術中所使用嘅達文西機械臂，來繪畫中國水墨畫。喺趙教授精準嘅操控同機械臂嘅「巧手」下，筆觸更細膩！
隨住醫學科技進步，醫生可以喺機械臂嘅協助下，進行更精確細緻嘅手術，但原來機械臂仲可以用嚟繪畫！趙教授以前接受訪問時曾經講過，任何技術，無論係揸毛筆畫畫，定係揸刀做手術，都有藝術元素，而今次佢咁破格，將國畫藝術結合外科手術，足以印證佢呢個講法。
趙教授除咗係治療早期胃癌嘅專家之外，亦係嶺南畫派門下弟子，十四歲時開始跟知名大師趙少昂學藝，而佢媽媽伍月柳亦係該畫派嘅第三代傳人，佢同媽媽亦曾舉辦聯合畫展。
