政情：陳述性別定型陳章明被叫下台

陳章明喺三‧八婦女節一個活動話香港女性有兩條「事業線」，一條係家庭嘅，一條係工作嘅，由女性擔當嘅家庭角色係男人做唔到，例如做家務。而香港人口老化，因女性細心，所以通常女性照顧老人，仲話自己屋企父母都係由佢太太照顧，佢老咗亦會由個女照顧，唔會搵個仔照顧，因為男士要外出工作。

曾以「老同」形容同性戀者

陳章明講到好似所有男士都唔識同唔會做家務，家務同照顧長者就係女性天職咁，關注新移民婦女事務嘅團體同根社就聯同天水圍社區發展網絡、婦女參政網絡等多個團體尋日去平機會踩場，鬧爆陳章明，話要掃走佢嘅「陳」舊性別觀念。

該等團體又批評陳章明成日講錯嘢，包括話香港人唔結婚、唔生仔係反映家庭價值已經腐化，又試過以「老同」形容同性戀者，認為佢並非唔小心犯錯，而係想法陳舊，而多年來亦唔見佢為女性爭取權益，認為佢根本係白（扌豆）人工、尸位素餐，平機會唔應包庇佢，仲遞交約六百人聯署信件，要求佢落台。

群情洶湧，陳章明出嚟接信時，一時頭耷耷，一時擔天望地，又死撐自己冇貶低女性，話當日言論係對女性辛勞表示欣賞，如引起誤會感到抱歉。平機會亦就此發聲明，指陳章明言論原意係肯定女性喺家庭同工作多方面嘅付出，想藉此呼籲大眾支持女性，無意強化兩性性別定型形象喎。

死撐冇秘撈 遭踢爆即改口

陳章明講錯嘢惹禍都唔係第一次，佢上任時就被揭其任職嶺南大學時秘撈，當時佢由死撐到承認秘撈，就話係自己記錯，先至誤導傳媒。佢成日口噏噏當秘笈，今次又再禍從口出，搞出個大頭佛。